У канцэртнай зале Полацкага дзяржаўнага ўніверсітэта прайшла вечарына, прысвечаная беларускім Калядам. Тэатралізаваную музычную пастаноўку падрыхтаваў шырока вядомы ў рэгіёне фальклорны гурт «Варган». Гледачы авацыямі віталі ўдзельнікаў калектыву, дзякавалі за магчымасць адчуць эстэтычную асалоду, пазнаёміцца са старажытнымі традыцыямі і самабытнай культурай нашага народа.

Фота: Кірыл Смалякоў

«Фальклор, народную культуру можна ўявіць як магутнае дрэва, карані якога сягаюць самых глыбінь старажытнасці, якое жыве, развіваецца і ўбірае ў сябе кожную новую эпоху, новыя вобразы і сэнсы», – з такіх слоў пачала вечарыну кіраўніца фальклорнага гурта «Варган» Вольга Емяльянчык.

Яна запрасіла гледачоў акунуцца ў чароўную атмасферу гукаў і эмоцый, што суправаджалі калядныя святы. А затым на сцэну выйшлі хлопцы і дзяўчаты ў прыгожых народных строях. Яны спявалі, танцавалі, гралі на цымбалах, скрыпках, гармоніку, дудзе і бубне, паказвалі элементы старадаўніх звычаяў і абрадаў, з дапамогай якіх нашы продкі імкнуліся гарманізаваць сваё жыццё з рытмамі Сусвету, забяспечыць шчасце і дабрабыт на ўвесь наступны год.

Напрыканцы вечарыны варганаўцы наладзілі для ўсіх прысутных танцы пад жывую музыку. Удзельнікам калектыву ўдалося стварыць сапраўдную калядную містэрыю і ўразіць гасцей чароўным дзействам, што стала адметным падарункам на святы. Вось якімі ўражаннямі падзяліліся некаторыя з гледачоў.

Наталья, администратор модельного агентства «Я первый раз была на концерте группы «Варган», да и вообще на подобном представлении. В какой-то момент поймала себя на том, что погрузилась в почти медитативное состояние, атмосфера, звуки, световые эффекты – ты как будто находишься внутри действия, а не смотришь на сцену. Очень-очень здорово!».

Кацярына, настаўніца:

«Варган» – прыгожы, таленавіты, цудоўны калектыў. Ідзеш да іх на імпрэзу і ведаеш, што падману не будзе – абавязкова пабачыш нешта такое, што натхніць, ўзрушыць, выкліча захапленне. На гэты раз удзельнікі гурта нават пераўзышлі самі сябе. Выдатны выступ, неверагодная сцэнаграфія, тонкае, глыбокае адчуванне традыцый. На нашых вачах ствараўся сапраўдны калядны цуд. Прыгожыя беларускія спевы здаваліся касмічным пасланнем ад усіх продкаў, якія стаяць за намі і, лічу, за нас таксама стаяць. Віншую «Варган» з такім выдатным праектам. Рада была стаць сведкай чароўнай Каляднай містэрыі».

Уладзімір, перакладчык:

«Вось і прайшла чвэрць 21-га стагоддзя. Смартфоны сталі працягам рукі, жыццё перамяшчаецца ў анлайн, штучны інтэлект становіцца паўнавартасным суразмоўцам. Тым не менш, чалавецтва пакуль не пазбавілася архетыпічнай, падсвядомай прагі рытуальных дзеянняў.

Канфуцый лічыў рытуал асновай дзяржаўнага ды грамадскага ладу, без якой само існаванне цывілізаванай чалавечай супольнасці не ўяўлялася магчымым. А дзякуючы «Варгану» мы сталі сведкамі і ўдзельнікамі рытуалу як часткі культурнай матрыцы, з'ядналіся з тысячагадовай традыцыяй перадачы культурнага коду з года ў год, з пакаленне ў пакаленне, са стагоддзя ў стагоддзе.

Адметнасцю цыклічных святаў можна назваць нязменнасць дзеянняў, што гарманізуюць непрадказальнае чалавечае жыццё з рытмам Сусвету. А прымеркаваныя да салярнага цыклу святы яшчэ й калібруюць гадзіннік персанальнага лёсу з пульсам галактыкі. Што б ні адбывалася да сакральнай даты, рытуал змяняе саму тканіну прасторы-часу, робіць драматычныя падзеі бяскрыўдным малюнкам на ручніку жыцця.

Дзякуй гурту «Варган» і ўсім гасцям містэрыі за незабыўную атмасферу, за тое, што стварылі гэты партал у сакральнае вымярэнне. Упэўнены, што мы захаваем перажытыя пачуцці да наступных Калядаў.

А зараз час ісці далей, у новы год. І хай усім добрым людзям свеціць калядная зорка».

Читайте также: Возраст – не помеха: как в Полоцком регионе меняют представление о поддержке бизнес-инициатив

Дед Мороз – за рулем. В Полоцке запустили новогодний автобус

Детский музей Полоцка приглашает на выставку «Новогодние игрушки моей семьи»

В Новополоцке появились новые туристические маршруты. Что предлагают посмотреть?