У Полацкай цэнтральнай бібліятэцы імя Францыска Скарыны адбылася ўтульная сустрэча з творчай сям’ёй палачан. Маргарыта і Яўген Папакуль ахвотна прэзентавалі свае новыя кнігі, падзяліліся асаблівасцямі пісьменніцкай і перакладчыцкай дзейнасці, а таксама расказалі пра літаратурныя планы на будучыню.

Кастрычнік у герояў сустрэчы выдаўся надзвычай плённым, бо з друку выйшлі ажно тры кнігі: зборнік фэнтэзійных аповесцяў «Вершнікі на дарозе» і казачная аповесць «Муры, Том і дырыжаблік» аўтарства Маргарыты, а таксама заключны том старажытнаісландскай трылогіі «Эда. Песні пра герояў» у перакладзе Яўгена. Нездарма ж уся імпрэза прайшла пад слоганам «Міфы. Фэнтэзі. Коцікі», што вельмі добра ілюструе разнастайнасць творчых сфераў аўтараў.

Але толькі трыма кнігамі тут не абыйшлося. Яўген прэзентаваў увесь эдычны трохтомнік, распавёўшы пра цікавосткі і складанасці працы з тэкстамі на старажытнаісландскай мове, зачытаўшы ўлюбёныя ўрыўкі. А яшчэ казаў пра актуальнасць твораў ХІІІ стагоддзя і нават пра згадкі Беларусі ў іх!

Маргарыта падзялілася з ўдзельнікамі сустрэчы сваімі кастрычніцкімі навінкамі, якія сталі сапраўднай падзеяй у беларускай літаратуры («Вершнікі на дарозе» адкрываюць цэлую серыю «Фантастыкі і фэнтэзі»), а таксама распавяла пра цудоўны зборнік аповесцяў  «Яблыкі», з якім у 2017 стала лаўрэатам Нацыянальнай літаратурнай прэміі ў намінацыі «Дэбют».

Не абышлося і без інтэрактыву: госці імпрэзы адгадвалі старажытнаісландскія загадкі ХІІІ стагоддзя, адказвалі на хітрыя і вясёлыя пытанні па новых кнігах Маргарыты.

Напрыканцы сустрэчы наведвальнікі атрымалі цудоўную магчымасць пагутарыць з Маргарытай і Яўгенам, задаць пытанні і займець кнігі з аўтарскімі аўтографамі. У любым выпадку з пустымі рукамі з імпрэзы не сышоў ніхто: хтосьці вярнуўся дадому з кніжнымі скарбамі, хтосьці з памятнымі падарункамі за правільныя адказы на інтэрактыве, але дакладна ніхто не застаўся без добрага настрою і ладнай порцыі станоўчых эмоцый.

Ну а тым, хто не патрапіў на цікавую сустрэчу, раім пачытаць кнігі нашых землякоў, каб узбагаціцца новымі ведамі і эмоцыямі, адкрыць для сябе невядомае, загадкавае, чароўнае. Набыць кнігі можна ў інтэрнэткрамах і кнігарнях.

Читайте также: Освоено 3 миллиона рублей. Министр культуры оценил, как идет реставрация Спасо-Преображенской церкви в Полоцке

В Полоцке состоялся концерт «Rastrelli Cello Quartet». Фотографии

В Полоцком музее ткачества прошел мастер-класс. Там научили делать медовые свечи из вощины