Падарожжа ў эпоху Асветніцтва. Самыя цікавыя экспанаты Музея-бібліятэкі Сімяона Полацкага

13:21, 20.03.2020 3272 Источник: gorod214.by

Музей-бібліятэка Сімяона Полацкага змясцілася ў будынку былога жылога корпуса мужчынскага Богаяўленскага манастыра. Гэта адзінае месца, дакладна звязанае з імем славутага палачаніна: у школе пры манастыры ён у свой час вучыўся, а пасля працаваў настаўнікам, тут жа ў велічным Богаяўленскім саборы прыняў пострыг у манахі.

Чарговы выпуск спецпраекта gorod214.by «Цуды полацкіх музеяў».

Музей-бібліятэка ўражвае сваім інтэр’ерам. Тут створана незабыўная атмасфера навуковай бібліятэкі эпохі Асветніцтва. Рэдкі госць, зайшоўшы сюды, не падумаў: «Як добра было б прысесці за гэты стол і пачытаць кнігу». Мабыць, пра такую бібліятэку марыў і Сімяон Полацкі, пакідаючы ў спадчыну роднаму гораду свае кнігі.

Экспазіцыя Музея-бібліятэкі раскрывае пакручасты і насычаны падзеямі жыццёвы шлях Сімяона Полацкага. Самае каштоўнае ў ёй – арыгінальныя выданні асветніка.

1. У 1666 годзе адбыўся Вялікі Маскоўскі сабор, які судзіў патрыярха Нікана за самавольны сыход з прастолу. Сімяон Полацкі прымаў удзел у ім у якасці сакратара і перакладчыка ўсяленскіх патрыярхаў – александрыйскага Паісія і антыахійскага Макарыя. Яму ж даручылі па выніках сабора стварыць трактат «Жазло праўлення», скіраваны супраць царкоўнага расколу. У экспазіцыі прадстаўлена маскоўскае перавыданне гэтага твора 1753 года.

zhezl1

zhezl2

zhezl3

2. Сімяон Полацкі разумеў выключную важнасць кнігадрукавання ў справе распаўсюджвання асветы, таму ў 1679 годзе з дазволу цара Фёдара ён заснаваў у Маскве Верхнюю друкарню. Адным з першых выданняў друкарні стала кніга «Тэстамент» – лісты цара грэчаскага Васіля да свайго сына Льва Філосафа. Сімяон Полацкі выступіў не толькі ў якасці выдаўца, але і перакладчыка з грэчаскай мовы, і аўтара прадмовы да кнігі.

testa1

testa2

testa3

3. Як асоба духоўная, Сімяон Полацкі меў права настаўляць людзей на іх жыццёвым шляху. Прамоўніцкая спадчына Сімяона Полацкага склала каля дзвюх соцень пропаведзяў. Частка з іх увайшла ў зборнік «Вячэра душэўная», што быў надрукаваны ў Верхняй друкарні ў 1683 годзе.

vech1

vech2

vech3

vech4

Гэтыя і іншыя цікавосткі можна пабачыць у Музеі-бібліятэцы Сімяона Полацкага з аўторка па нядзелю, з 10 да 17 гадзін па адрасе: Полацк, вуліца Ніжне-Пакроўская, 22.

015