Нягледзячы на складаны мінулы год, у Беларусі выходзілі мастацкія кнігі, адбываліся прэзентацыі і працуюць арганізацыйныя камітэты літаратурных прэміяў. Сярод іх і літпрэмія «Гліняны Вялес», найстарэйшая недзяржаўная ў Беларусі. Яна была заснаваная Таварыствам вольных літаратараў у 1993 годзе на Полаччыне.

Адмыслова для GOROD214.BY пра намінантаў прэміі распавядае старшыня арганізацыйнага камітэта, полацкі пісьменнік Алесь Аркуш.

Увага, у тэксце будуць спойлеры!

Гэтымі днямі стаў вядомы шорт-ліст «Вялеса» за 2020 год. Пазнаёмім з некаторымі кнігамі, якія трапілі ў «вялесаўскі шорт». Бадай, самая вядомая з гэтах кніг – раман Віктара Марціновіча «Рэвалюцыя». Пра тое, што Віктар рыхтуе да выдання свой новы раман, было вядома яшчэ напачатку мінулага года. Ён сам пра гэта паведаміў у інтэрв’ю.

Фота: Кніжная шафа

Інтрыгавала назва. Віктар у інтэрв’ю адзначыў, што раман быў напісаны задоўга да сённяшніх падзеяў. І, на самой справе, кніга апавядае зусім не пра рэвалюцыю ў звыклым для нас разуменні гэтага слова.

Падзеі адбываюцца ў постсавецкай прасторы. Ужо няма Савецкага Саюза, але гэтай прасторай усё роўна кіруе таямнічая структура, на чале з быўшым сябрам Палітбюро. Структура ўвесь час вярбуе ў свае шэрагі новых сяброў. Кіраўнік структуры, адчуваючы што ягоны смяротны час ужо блізка, пачынае шукаць сабе замену.

Выбар выпаў на маладога выкладчыка ўніверсітэта, якога падманам уцягваюць у структуру. Спачатку выкладчык як бы не прымае метады дзейнасці структуры, якія нагадваюць хутчэй мафіёзныя. Але, адчуваючы небяспеку з-за сваёй нелаяльнасці, ён пачынае барацьбу за ўладу.

Набыць кнігу можна і ў кнігарнях Полацка і Наваполацка (ад рэд.)

Хоць на самой справе ўсё гэта было інспіравана старым кіраўніком структуры, каб праверыць у дзейнасці свайго спадкаемцу. І малады выкладчык перамагае. Але на самой справе адбыўся проста трансфер улады. Пісьменнік як бы сцвярджае, што мяняюцца формы і метады кіравання, але сутнасць улады заўсёды застаецца ранейшай.

Фота з адкрытых крыніц

Раман Артура Клінава «Локісаў» таксама даўно быў анансаваны. Ён павінен быў выйсці яшчэ ў 2019 годзе, але затрымаўся і пабачыў свет толькі летась. У новым творы аўтар застаецца верным сваёй стылістычнай манеры, калі апавяданне вядзецца дынамічна, з прыгодамі, з «інтэлігентанай усмешкай».

Сюжэт такі. Недзе на поўначы Беларусі з даўніх часоў нібыта жывуць пярэваратні. Толькі гэта не ваўкалакі, а локісы, то-бок людзі, якія ператвараюцца ў мядзведзяў. У гэты глухі райцэнтр прыязджае сталічны мастак з прозвішчам Локісаў, які хоча купіць у тым раёне дамок пад лецішча. Але ў райцэнтры пачынаецца перапалох, бо аказваецца, што гэты мастак спадкаемца мясцовых графаў, уладальнікаў тутэйшага палаца, якія і былі галоўнымі локісамі.

Якраз напярэдадні прыезда Локісава нейкі драпежнік на лясной дарозе забіў жанчыну. Мастаку, якога адразу западозрылі ў злачынстве, мясцовы пракурор забараняе з’язджаць з райцэнтра пакуль усё не высветліцца. І пачынаецца змаганне мастака з усімі мясцовымі прымхамі, забабонамі і «раённымі мафіямі».

Фота з адкрытых крыніц

Зусім нечаканы раман летась выйшаў у Сяргея Балахонава. «Бог кахання Марс» – гэта рэчаіснасць пераплеценая з фантастыкай, і ўсё тут густа замешана на інтрыгах і прыгодах неверагоднага кахання. Падзеі адбываюцца ў Гомелі, у родным горадзе пісьменніка. Малады выкладчык-гісторык мясцовага ўніверсітэта закахаўся ў дзяўчыну. Але яна, калі была на практыцы за мяжой, пакахала іншага хлопца, замежнага, і пабралася неўзабаве з ім шлюбам.

І вось гэты выклачык-гісторык паставіў за мэту любымі сродкамі вярнуць сабе каханую. Пачалося неверагоднае змаганне, якое закончылася трагічна на Марсе, падчас экспедыцыі на гэтую планету.

Чытайце таксама: Будынак ля Сафійкі, які быў магазінам, ваенкаматам і інфекцыёнкай. Распавядаем яго гісторыю і зазіраем у будучыню (Фота)

90 год з дня нараджэння Ўладзіміра Караткевіча. Што звязвае легендарнага пісьменніка з Полацкам?

Што пачытаць зімой? Раім сем абавязковых кніг для тых, хто лічыць сябе палачанамі (і не толькі)