Выкладчыкі і студэнты Полацкага дзяржаўнага ўніверсітэта праводзяць раскопкі на тэрыторыі Верхняга замка ў Полацку ў межах археалагічнай практыкі першакурснікаў спецыяльнасці «Гісторыя».
Фота: Кірыл Смалякоў
Раскопкі дапамагаюць адкрыць нязведаныя старонкі гісторыі Полацка, а студэнтам даюць магчымасць пашырыць веды і сваімі рукамі дакрануцца да каштоўных артэфактаў.
У навуковых мэтах, як патлумачыў выкладчык ПДУ Аляксей Коц, важна працягнуць даследаванні старажытных помнікаў. Летась, калі археалагічны атрад універсітэта ладзіў раскопкі на суседняй тэрыторыі, былі выяўлены рэшткі разбуранага храма 12 стагоддзя, а побач могілкі, што датуюцца 12-13 ст.
Цяпер удалося ўдакладніць лакалізацыю могілак, вызначыць іх паўночную мяжу.
– Рэшткі храма фіксуюцца эпізадычна, значыць мы аддаляемся ад невядомага нам пакуль помніка, трэба шукаць яго ў іншым месцы, – патлумачыў Аляксей Коц. – А тут, дзе мы зараз, відавочна была частка жылой зоны Полацка. Выяўлена вялізная мацерыковая яма, па папярэдніх высновах, гэта мог быць вадаадвод для спуску вады. Ёсць шэраг знаходак самага старажытнага часу. Напрыклад, паясная накладка і гузікі 10-11 ст.
Працягнуць навуковую экспедыцыю археолагі плануюць даследаваннем парэшткаў княжаскага церама на Верхнім замку. Дапамагаюць праводзіць працы валанцёры з ліку былых студэнтаў, людзей, якія захапляюцца археалогіяй і здольныя прысвячаць вывучэнню даўніны свой вольны час.
Чытайце таксама: «На Купалу сонца йграла». Як адзначаецца адно з самых любімых свят беларусаў, распавядае доктар гістарычных навук з Полацка
Прыгажосць і непаўторнасць Беларусі адлюстроўвае новая выстава ў музеі Наваполацка
Оставайтесь с нами в социальных сетях:
