Каляды па беларускіх традыцыях адзначылі ў Полацку. Музей традыцыйнага ткацтва Паазер’я запрасіў жыхароў і гасцей горада паглядзець, як ладзілі свята нашы продкі, паўдзельнічаць у абрадавых дзеяннях, народных танцах, гульнях, варожбах.

Фота: Кірыл Смалякоў

Калядныя святы прымеркаваныя да зімовага сонцавароту і змяшчаюць у сабе шмат сімвалізму. У прыродзе адбываюцца вялікія змены: святло перамагае цемру, дзень робіцца большым за ноч, стары знямоглы год памірае і саступае месца новаму, поўнаму моцы і энэргіі вітку жыцця.

Нашы продкі верылі, што ў гэты пераходны час кожная рэч набывае знакавы характар, а калі правільна выканаць пэўныя дзеянні, можна паўплываць на будучыню і як бы запраграмаваць сабе тое, пра што марыш.

У музеі ткацтва ўжо шмат гадоў аднаўляюць калядны абрад з удзелам фальклорнага гурта «Варган», і традыцыя, перанесеная ў сучаснасць, заўсёды збірае шырокае кола прыхільнікаў.

Шматлюдна, цёпла, утульна было ў музеі і сёлета. Госці з задавальненнем уключыліся ў святочную імпрэзу, падтрымалі танцы, гульні, рытуальныя дзеянні.

Асаблівую цікаўнасць выклікалі традыцыйныя калядныя варожбы. Галоўным прадказальнікам будучыні стаў певень. Грамадой вырашылі, што ён накукарэкаў палачанам поспеху і дабрабыту на ўвесь год.

З Казой, што сімвалізуе плоднасць і ўрадлівасць, а таксама іншымі міфалагічнымі персанажамі, на свята завіталі калядоўшчыкі. Яны праспявалі ўдзельнікам вечарыны велічальныя песні, пажадалі шчодрага і шчаслівага Новага году. А каб пажаданні збыліся, прысутныя адарылі гасцей пачастункамі.

Чытайце таксама: Утульнасць, цеплыня і душэўная атмасфера. У Наваполацку запрашаюць на выставу вырабаў з лазы

«Дзе каза бывае – там шчасце чакае». Калядныя вячоркі з танцамі ладзілі ў Полацку

Майстар па саломапляценню Нэлі Радзько прэзентуе магічную выставу ў Наваполацку