Хрысціяне заходняга абраду адзначаюць сёння Вялікдзень – Светлае Уваскрасенне Хрыстова. Паўсюдна ў храмах гучаць натхняльныя словы пра тое, што жыццё перамагае смерць, святло пануе над змрокам, любоў магутнейшая за нянавісць, а праўда і справядлівасць – несмяротныя. Урачыстыя набажэнствы прайшлі таксама ў касцёле Святога Андрэя Баболі ў Полацку. Адно з іх наведаў наш фотакарэспандэнт Кірыл Смалякоў, каб перадаць чытачам атмасферу свята.
Святую імшу ўзначаліў ксёндз полацкага касцёла Францішак Кісель. У сваім звароце ён павіншаваў вернікаў і патлумачыў сутнасць свята:
«Уваскрасенне Хрыста – гэта пачатак новага жыцця для кожнага чалавека, таму што сапраўднае абнаўленне заўсёды пачынаецца з сэрца, з сумлення. Але Пасха – гэта таксама і пачатак новага свету, вызваленага з рабства граху і смерці. Свету, канчаткова адкрытага на Божае валадарства – валадарства любові, міру, праўды, справядлівасці і братэрства».
Апошні час, як адзначыў святы айцец, чалавецтва перажывае цяжкія выпрабаванні. Мінулыя гады былі пазначаны пандэміяй, сёлета Пасха таксама незвычайная, бо святкуецца, калі ідзе вайна, падаюць бомбы, пакутуюць і гінуць людзі, у тым ліку жанчыны, старыя, дзеці.
Усё гэта, па словах пробашча, можа выклікаць панурасць і абыякавасць. Але ў хвіліны роспачы трэба шукаць падтрымку ў словах Хрыста, які нікога не пакідае і ўсім дае надзею. Запальваючы ў храме свечкі, кожны вернік павінен запальваць святло і ў сваім сэрцы.
«У свята перамогі жыцця над смерцю, грахом і злым духам, – сказаў Францішак Кісель, – трэба звяртацца да Езуса Ўваскрослага, каб Ён учыніў у нашай Бацькаўшчыне, ва Украіне і ва ўсім свеце так, каб як мага хутчэй запанавалі мір, ўзаемная любоў, дух прабачэння, свабода і справядлівасць».
Фото: Кирилл Смоляков
Читайте также: «Каб Вялікдзень сустрэць з добрымі навінамі». Малітвы за мір ва Украіне узнеслі вернікі ў касцёле Полацка
Оставайтесь с нами в социальных сетях:
